Louise Piëch dhe Ferry Porsche i hapën rrugën një strukture të re të kompanisë në vitin 1971. Ata vendosën që të gjithë anëtarët e familjeve të tërhiqeshin nga funksionet operative, si në Salzburg ashtu edhe në Shtutgart, dhe të kalonin në bordet mbikëqyrëse të të dyja kompanive.Kalimi i drejtimit te një ekip i pavarur menaxhimi u pasua nga një ristrukturim i pjesshëm i kompanisë dhe, më vonë, nga marrja përsipër e shpërndarjes së markës Audi.

Kompania vijoi të rritej. Në vitin 1974, Porsche Holding Salzburg u themelua si organizata e re ombrellë për Porsche Group në Austri. Porsche Austria u caktua si importues i Volkswagen, duke përmirësuar ndjeshëm konkurrueshmërinë e rrjetit të shitjes së Volkswagen në Austri, kjo edhe falë zhvillimit të mëtejshëm të rrjetit të shpërndarjes.Në të njëjtën kohë, u bë e mundur forcimi i pozicionit të markës Volkswagen, pavarësisht rritjes së ndjeshme të konkurrencës nga kompanitë e Lindjes së Largët.

Organizata e re Porsche Inter Auto konsolidoi, duke filluar nga viti 1977, koncesionarët e ndryshëm të automjeteve të Porsche Holding.

Vitet 1970 sollën luhatje të forta në tregun austriak. Rritja e ndjeshme e TVSH-së në vitin 1978, e cila zbatohej edhe për automjetet, pati një ndikim veçanërisht të madh. Shitjet u rritën me shpejtësi përpara hyrjes në fuqi të rritjes së taksës, për t’u ulur ndjeshëm menjëherë pas zbatimit të saj. Kompania jonë e shfrytëzoi këtë periudhë të paqëndrueshme për t’u përgatitur për të ardhmen. Njëkohësisht, dëshmuam gatishmërinë tonë për inovacion përmes investimeve të para në sektorë të tjerë jashtë aktivitetit tonë kryesor.

Si furnizues i pjesëve për Porsche 356 dhe Porsche 911, Porsche Holding Salzburg nisi të zhvillonte, në një shkallë më të vogël, një tjetër fushë të rëndësishme të aktivitetit. Kompania hyri në këtë sektor përmes investimeve në disa ndërmarrje industriale austriake, si Fichtel & Sachs dhe Alu Druck-Guss, të ndjekura nga blerja e grupit gjerman Zipperle në vitin 1988.Blerja e Taylorix AG krijoi një tjetër fushë të rëndësishme aktiviteti përmes zgjerimit në sektorin e teknologjisë së informacionit (IT). Pak kohë më vonë, të dy sektorët iu nënshtruan një procesi ristrukturimi në nivel global, çka bëri që Porsche Holding të tërhiqej gradualisht nga të dyja fushat.

Vitet 1980 iu kushtuan zhvillimit të Porsche Versicherungs AG dhe Porsche Bank AG, të cilat u specializuan kryesisht në sektorin e shërbimeve automobilistike. Deri më sot, Porsche Bank ka ruajtur pozicionin e saj si lider në tregun vendas të leasing-ut të automjeteve.Hapja e qendrës së re të shpërndarjes së pjesëve të këmbimit krijoi gjithashtu një dimension të ri në logjistikë dhe shpërndarje. Vite më vonë, kjo u shndërrua në një avantazh të rëndësishëm konkurrues, kur tregjet e Evropës Lindore dhe Juglindore u hapën ndaj mundësive të reja.

Rritja e markës spanjolle: në vitin 1984, morëm përsipër shitjen dhe shpërndarjen e markës SEAT në Austri dhe krijuam një rrjet krejtësisht të ri shpërndarjeje. Pjesa e tregut u rrit paralelisht me prezantimin e gjeneratës së re të modeleve SEAT.

Lëvizshmëri e re: Shërbimi i marrjes me qira të automjeteve të Grupit, të cilin kompania e zotëronte dhe e operonte që prej viteve 1960, iu transferua ARAC GmbH në vitin 1989. Sot, ajo është një nga kompanitë e marrjes me qira të automjeteve me traditën më të gjatë në Austri. Që nga viti 2003, kompania është gjithashtu mbajtëse e licencës së EUROPCAR në Austri, organizata më e madhe e marrjes me qira të automjeteve në Evropë.

Në fillim të viteve 1990, Intercar Austria GmbH nisi aktivitetin si importues i përgjithshëm i Škoda në Austri dhe zhvilloi një koncept të zgjuar shitjeje dhe marketingu për markën tradicionale çeke. Kështu, Škoda u bë shpejt një zgjedhje e preferuar për një grup të caktuar klientësh në Austri dhe, me zhvillimin e mëtejshëm cilësor të gamës së modeleve, më vonë u shndërrua në një sukses të vërtetë në treg. Në Austri, Porsche Holding Salzburg u përqendrua gjithashtu në zgjerimin e vazhdueshëm të pjesës së saj në tregun e automjeteve të përdorura, nën markën Weltauto.

Ndryshimet politike në Evropën Lindore i krijuan Porsche Holding një “mundësi të rrallë”, të cilën e shfrytëzuam me vizion, vendosmëri, frymë sipërmarrëse dhe gatishmëri për të marrë iniciativa të reja. Në vitin 1990, Volkswagen AG i ngarkoi kompanisë sonë krijimin e një rrjeti shpërndarjeje për markat e Grupit në Hungari. Porsche Hungaria, e sapothemeluar, kontribuoi në forcimin e reputacionit të Porsche në rajon përmes suksesit të saj të shpejtë në treg. Përveç kësaj, Porsche zgjeroi aktivitetet e saj në tregtinë me pakicë dhe u autorizua si distributor i Volkswagen dhe Audi në Bratislavë dhe Pragë.

Ndryshimet e mëdha në disa vende të Evropës Lindore patën ndikim edhe në aktivitetet e Porsche Holding Salzburg. Shpërbërja e Jugosllavisë dhe lufta që pasoi bënë të pamundur që kompania e dikurshme në pronësi të fabrikës në Sarajevë të furnizonte Slloveninë me automjete Volkswagen dhe Audi. Në vitin 1993, pas shqyrtimit të të gjithë kandidatëve, Volkswagen AG ia besoi Porsche-s përgjegjësinë si importues në Slloveni. Një vit më vonë, në vitin 1994, u nënshkrua edhe kontrata e importit për Sllovakinë, pasi ndarja nga Republika Çeke kishte ndërprerë kanalet e mëparshme të furnizimit.

Porsche Informatik u themelua nga Externa në vitin 1996, duke u zhvilluar nga sektori i IT-së, i cili kishte nisur të zhvillohej që në fund të viteve 1960. Portofoli i shërbimeve të IT-së ishte tashmë i përshtatur plotësisht me nevojat e tregtisë së automjeteve.Ky ofrues shumë i specializuar shërbimesh u bë shpejt i njohur për zgjidhjet e tij të shkëlqyera të IT-së për sektorin e tregtisë me pakicë të automjeteve.

Porsche Holding Salzburg vijoi punën e saj pioniere në krijimin e rrjeteve të shpërndarjes për markat e Volkswagen Group në vendet e ish-bllokut lindor. Investimet e Porsche në zhvillimin afatgjatë të këtyre tregjeve të reja u zgjeruan në Rumani në vitin 1997 dhe në Kroaci në vitin 1999, përmes një sipërmarrjeje të përbashkët (joint venture).

Që në fillim të viteve 1970, në fazat e para të ndërkombëtarizimit të saj, Porsche Holding u përqendrua në Francë si importuese e Porsche dhe markave të tjera nga e gjithë bota. Ky pozicion në një nga tregjet më të rëndësishme të automjeteve u bë gjithnjë e më sfidues, pasi pothuajse të gjithë aktorët e tregut nisën të krijonin filialet e tyre. Për këtë arsye, kompania jonë kërkoi mundësi të reja zhvillimi në sektorin e tregtisë me pakicë në Francë dhe, në vitin 1999, bleu një pjesë të aksioneve në PGA, një nga grupet më të rëndësishme të tregtisë me pakicë të automjeteve në Francë. Në këtë mënyrë, ne arritëm të ripozicionoheshim në tregun francez. Më tej, PGA zgjeroi aktivitetet e saj edhe në Holandë dhe Poloni.

Me hyrjen në mijëvjeçarin e ri, Porsche Holding Salzburg hyri në një segment shumë ekskluziv të tregut. Në vitin 2000, nisëm aktivitetet e shitjes dhe shpërndarjes së markës britanike të Volkswagen Group, Bentley, përmes Exclusive Cars, ndërsa në vitin 2001 nisëm edhe aktivitetet e shitjes dhe shpërndarjes së markës italiane të automjeteve sportive, Lamborghini.

Në mijëvjeçarin e ri, zgjeruam gjithashtu aktivitetet tona në tregtinë e automjeteve në Serbi dhe Mal të Zi, si dhe në Bullgari në vitin 2004, ndërsa në Shqipëri dhe Maqedoninë e Veriut në vitin 2005 dhe në Ukrainë në vitin 2008.

Suksesi i shpejtë i Porsche Holding Salzburg në Evropën Qendrore dhe Juglindore u përshpejtua edhe më tej përmes krijimit të koncesionarëve të rinj në pronësi të Porsche Inter Auto në Republikën Çeke, Sllovaki, Hungari, Slloveni dhe Kroaci. Këto koncesionare përmbushnin standardet më të fundit të markave të Volkswagen Group dhe shërbenin si modele për pjesën tjetër të rrjetit të koncesionarëve. Porsche Inter Auto, e cila operon ekskluzivisht me markat e Volkswagen Group, është aktive jo vetëm në Austri dhe në tregjet e reja, por edhe në Gjermani, Itali dhe Poloni.

Në prill të vitit 2006, filiali ynë Exclusive Cars Vertriebs GmbH u bë partner i autorizuar i shitjeve për markën Bugatti në Austri dhe në vendet e Evropës Juglindore.

Në vitin 2006, Porsche Bank festoi 40-vjetorin e aktivitetit të saj. Zgjerimi i shërbimeve financiare të Porsche Bank në Hungari, Sllovaki, Slloveni, Kroaci, Rumani, Bullgari, Serbi, Mal të Zi, Ukrainë dhe Kolumbi kontribuoi ndjeshëm në suksesin e kompanisë në këto tregje. Një pjesë e konsiderueshme e automjeteve financohej përmes Porsche Bank, e cila ofronte shërbime financiare edhe për vetë organizatën e shitjeve.